चीनले अनुदानमा दिएको १८ हजार अक्सिजन सिलिण्डर तातोपानी आइपुग्यो
नेपाललाई चीन सरकारले अनुदानमा दिएको १८ हजार थान अक्सिजन सिलिण्डर तातोपानी नाकामा आइपुगेको छ ।अक्सिजन सिलिण्डर बोकेका चिनियाँ गाडी तिब्बतर्फको नाकामा आइपुगेको सरकारी उच्च स्रोतले जनाएको छ ।
सीसीएमसीका संयोजक समेत रहेका उपप्रधानमन्त्री ईश्वर पोखरेलले अक्सिजन सिलिण्डर अभाव हुन नदिन हवाइ र स्थल दुवै मार्ग प्रयोग गरिएको बताएका छन् ।
उपप्रधानमन्त्रीको प्रेस सल्लाहकार गणेश पाण्डेले १८ हजार थान सिलिण्डर प्रक्रिया पूरा गरेर काठमाडौँ ल्याउने तयारी रहेको बताएका छन् ।
तिब्बतको कुति (न्यालम) भन्सारबाट अघि बढेका अक्सिजन सिलिण्डर नेपाललाई चिनियाँ पक्षले हस्तान्तरण गर्ना साथ काठमाडौं पठाइने भन्सार कार्यालयले जनाएको छ । सामान हस्तान्तरणको सामान्य कार्यक्रमपछि स्वास्थ्य मन्त्रालयको जिम्मा लगाइने भएको छ ।
बांकी अक्सिजन सिलिण्डर, अक्सिजन कन्सर्नटेटर र भेन्टिलेटर लगायतका स्वास्थ्य सामाग्री लिन नेपाल एयरलाइन्सको वाइडबडी जहाज शनिवार साँझै बेइजिङ उडिसकेको छ ।
यसअघि नेपाल एयर लाइन्सको सोही जहज मार्फत ४ सय अक्सिजन लगायत स्वस्थ्य सामग्री काठमाडौं ल्याइसकेको छ । कोरोना महामारीविरुद्ध लड्न सहयोग पुगोस् भनेर चीनले २० हजार थान अक्सिजन सिलिण्डर, भेन्टिलेटर लगायतका स्वास्थ्य सामग्रीहरु नेपाल सरकारलाई अनुदानमा दिने घोषणा गरेको छ ।
उक्त स्वस्थ्य सामाग्री नेपाल सरकारले हवाइ मार्ग र स्थलमार्गद्वारा नेपाल ल्याउने व्यवस्था मिलाइएको छ । प्रशासन