वर्ल्डलिंकका निर्देशक बिजय जलानको कोरोनाबाट निधन
इन्टरनेट सेवा प्रदायक कम्पनी वर्ल्डलिंक कम्युनिकेसन्स लिमिटेडका संस्थापक तथा निर्देशक बिजय जलानको कोभिड-१९ बाट निधन भएको पारिवारिक स्रोतले जनाएको छ ।
वर्ल्ड लिंकको स्थापना कालदेखि नै जालन व्यवस्थापकीय भूमिकामा थिए । वैशाख १५ गते नर्भिकमा परीक्षण गराउँदा उनमा कोभिड–१९ संक्रमण देखिएको थियो ।
संक्रमीत भएसँगै बिगत दुई सातादेखि ४६ वर्षिय जलान ललितपुरमा रहेको नेपाल मेडिसिटी अस्पतालमा उपचारत थिए ।जलान करिब १५ दिन अघि अस्पताल भर्ना भएका उनको भेन्टेलेटरमा राखेर उपचार भइरहेको थियो ।
गत वैशाख १८ गते अस्पताल भर्ना भएका उनको स्वास्थ्य अवस्था पछिल्ला दिनहरुमा सुधारोन्मुख रहेको थियो । बुधबार बेलुकी भेन्टेलेटरबाट बाहिर निकालिएका उनलाई केही असहज भएपछि पुनः भेन्टिलेटरमै सारिएको थियो ।
उनको अस्पतालको सघन उपचार कक्षमा उपचाररत रहँदा आज बिहान करिब ८ बजे निधन भएको हो ।अध्यक्ष दिलिप अग्रवाल, स्वर्गिय जलान र अर्का संस्थापक सदस्य मनोज अग्रवाल मिलेर तत्कालिन समयमा वर्ल्डलिंकको स्थापना गरेका थिए ।
महोत्तरी जिल्लाको जलेश्वरमा जन्मिएका स्वर्गिय जलानको श्रीमती र एक छोरा छन् ।
