बंगलादेशबाट ७ हजार डोज रेमडेसिभिर औषधी आइपुग्यो काठमाडौं
आज बंगलादेशबाट कोरोनाविरुद्ध प्रयोग हुने औषधी रेमडेसिभिरको सात हजार डोज काठमाडौँ आइपुगेको छ ।
औषधी व्यवस्था विभागका अनुसार आजैदेखि उक्त औषधीको वितरण सुरु गरिने भएको छ । कोरोना संक्रमित बढ्दै गएको र उक्त औषधीको माग पनि वृद्धि हुन थालेपछि नेपाल ल्याइएको विभागले जनाएको छ ।
दिउँसो ३ बजेदेखि औषधीको वितरण सुरु भएको छ ।उक्त औषधीलाई काठमाडौँ र प्रदेशस्थित कोभिड अस्पतालमा पठाउने तयारी भैरहेको छ । नेपालस्थित आधिकारिक आयातकर्ताको पहलमा औषधी ल्याइएको हो ।
स्वास्थ्यमन्त्री हृदयेश त्रिपाठीले शनिबार केही दिनभित्रै कोभिडका लागि चाहिने अत्यावश्यक औषधी काठमाडौँ आइपुग्ने बताए ।
प्रधानमन्त्री केपी शर्मा ओलीले पनि सोमबार देशवासीको नाममा सम्बोधन गर्दै चीन र रुसबाट खोप ल्याउन खरिद प्रक्रिया सुरु गरिएको बताएका थिए ।
