प्रधानसेनापति थापा र प्रधानन्यायाधीश जबराबीच भेटबार्ता
प्रधानसेनापति पूर्णचन्द्र थापा र प्रधानन्यायाधीश चोलेन्द्र शमशेर जबराबीच भेटबार्ता भएको छ ।
आज सोमबार सर्वोच्च अदालतमा प्रधानन्यायाधीश जबरा र प्रधानसेनापति थापाबीच भेटघाट भएको सर्वोच्च अदालतस्थित स्रोतले जानकारी दिएको छ ।
स्रोतका अनुसार प्रधानन्यायाधीश र प्रधानसेनापति बीच सर्वोच्च अदालत पछाडि सेनाको क्याभलरी रहेको जग्गा सर्वोच्चका नाममा नामसारी गर्ने विषयमा छलफल भएको हो ।
प्रधानमन्त्री केपी शर्मा ओलीले अवहेलना मुद्दाको जवाफ दिन गएका बेला सर्वोच्च अदालत परिसरको निरीक्षण समेत गरेका थिए । अदालतको परिसर साँघुरो भएको भन्दै सर्वोच्चले सेनाको क्याभलरीको जग्गा प्रक्रियागत रुपमा नै आफ्नो नाममा नामसारी गर्नका लागि पहल गरिरहेको थियो ।
तर,सर्वोच्च अदालतमा प्रतिनिधिसभा विघटनको मुद्दामा बहस सकिएर ‘हेर्दाहेर्दै’मा रहेको बेला भएको प्रधानन्यायाधीश र प्रधानसेनापति बीचको भेटलाई अर्थपूर्ण रुपमा हेरिएको छ ।