Logo
१५ चैत्र २०८०, बिहीबार
(January 20, 2021)

‘सामाजिक उत्तरदायित्वका लागि पत्रकारिता’

आगामी सातादेखि एकद्वार प्रणाली शुरु हुँदै

आयात र निर्यातलाई भन्सारसँग आवद्ध गरी अन्तरराष्ट्रिय व्यापारलाई सहजीकरण गर्न आगामी सातादेखि नेपाल राष्ट्रिय एकद्वार प्रणाली शुरु गरिने भएको छ।

अर्थ मन्त्रालयमा बुधवार आयोजित कार्यक्रममा भन्सार विभागले आगामी सातादेखि खाद्य प्रविधि तथा गुण नियन्त्रण विभाग, पशु सेवा विभाग र प्लाण्ट क्वारेन्टाइन केन्द्रमा एकद्वार प्रणाली शुरु गर्ने जानकारी दिएको हो ।

तीन ओटा विभागबाट शुरु गरिने कार्यक्रम चरणवद्ध रुपमा विस्तार गरिनेछ जसमा सरकारी र निजी क्षेत्र रहनेछन् ।

भन्सार विभागका अनुसार एकद्वार प्रणाली शुरु भएपछि तीन ओटै विभाग र अन्तर्गतका कार्यालयहरुमा डिजिटल प्रणालीको शुरुवात हुनेछ । लाइसेन्स वा अनुमतिका लागि निकास तथा पैठारीकर्ताहरु विभाग तथा कार्यालयहरुमा पुगि राख्नु पर्ने छैन भने पनि पेपरवर्कको पनि अन्त्य हुने छ ।

उक्त अवसरमा अर्थमन्त्री विष्णुप्रसाद पौडेलले एकद्वार प्रणाली शुरु भएपछि व्यापारका लागि सहजीकरण हुने, अनियमितता र राजस्व चुहावट नियन्त्रण हुने, कार्य सम्पादन छिटो र प्रभावकारी हुने विश्वास व्यक्त गरेका छन् ।

उद्योग वाणिज्य तथा आपूर्तिमन्त्री लेखराज भट्टले कार्यान्वयनका लागि दक्ष जनशक्तिको व्यवस्था गर्न र अनुगमन प्रणालीमा विशेष ध्यान आवश्यक रहेको बताए।

कृषि तथा पशुपंछि विकास पद्माकुमारी अर्यालले एकद्वार प्रणालीले सेवा प्रवाहलाई पारदर्शी बनाउने बताउँदै सबै निकायमा पूर्ण रुपमा लागू गर्ने बताइन् । राजस्व सचिव रामशरण पुडासैनीले एकद्वार प्रणालीलेले राजस्व परिचालनमा थप सहयोग पुर्‍याउने बताए ।

भन्सार विभागका महानिर्देशक सुमन दाहालले व्यापारसँग जोडिएका सरकारी र निजी गरी ४० ओटा निकायमा एकद्वार प्रणाली लागू गरिने जानकारी दिए । अर्थ मन्त्रालय, उद्योग वाणिज्य तथा आपूर्ति मन्त्रालय र कृषि तथा पशुपंछि विकास मन्त्रालयबीचको समन्वय र सहकार्यमा एकद्वार प्रणाली लागू हुनेछ ।

प्रकाशित मिति: Jan 20, 2021

प्रतिक्रिया दिनुहोस्