नेपालमा कोरोना खोप पठाउने भारतको निर्णय
भारतले नेपाललगायत आफ्ना निकट मित्र राष्ट्रलाई कोरोना खोप दिने निर्णय गरेको छ।
भारतीय सञ्चारमाध्यमका अनुसार सोमबार बसेको स्वास्थ्य मन्त्रालय, विदेश मन्त्रालय, वाणिज्य मन्त्रालय र औषधि विभागको संयुक्त बैठकले नेपाललगायत भारतका अत्यन्त नजिकका छिमेकी मुलुकमा सीमित संख्यामा कोरोना खोपको डोज पठाउने निर्णय गरेको हो।
निर्णयअनुसार नेपाल, भुटान, सेसल्स, अफगानिस्तान र बंगलादेशलाई सिरम इन्स्टिच्युटले उत्पादन गरिरहेको कोभिसिल्ड खोप प्रदान गरिनेछ भने मंगोलिया, ओमान, म्यान्मार, फिलिपिन्स, बहराइन, मालद्वीप र मरिसियसलाई चाहिँ भारत बायोटेक कम्पनीले उत्पादन गरेको खोप पठाइनेछ।
एक अधिकारीले दिएको जानकारीअनुसार दुवै खोप सरकारी स्तरबाट सप्लाई गरिनेछ। यसको चाँजोपाँचो भने परराष्ट्र मन्त्रालयले मिलाउनेछ। तर समाचारमा पठाउने समय र खोपको संख्या उल्लेख गरिएकाे छैन।
