महन्थ ठाकुर भन्छन् : ‘अदालतप्रति पूर्ण विश्वास गर्दै पर्ख र हेरको स्थितिमा छौं’
जसपाका अध्यक्ष महन्थ ठाकुर संसद् विघटन सम्बन्धी मुद्दा सर्वोच्च अदालतमा विचाराधीन रहेकाले पर्ख र हेरको स्थितिमा रहेको बताएका छन् ।
पार्टी निकट प्रेस नेपालले भैरहवामा आइतबार आयोजना गरेको पत्रकार भेटघाटमा अध्यक्ष ठाकुरले प्रतिनिधिसभा विघटन सम्बन्धी मुद्दा सर्वोच्च अदालतमा विचाराधीन रहेकाले अदालतप्रति पूर्ण विश्वास गर्दै पर्ख र हेरको स्थितिमा रहेको बताएका हुन् ।
ठाकूरले भने, ‘हामी पर्ख र हेरको स्थितिमा छौं, अदालतप्रति पूर्ण विश्वास छ, त्यसैले अगाडिको रणनीति त्यसपछि मात्र निर्धारण गरिनेछ ।’
प्रतिनिधिसभा विघटन संविधान विपरीत भएकाले यसविरुद्ध आफ्नो पार्टीले सबैभन्दा पहिले आन्दोलन सुरु गरेको र विरोधमा जनताको व्यापक सहभागिता भएबाट आन्दोलन सफल भएको अध्यक्ष ठाकुरले दाबी गरे ।
तत्कालीन मधेशवादी दलहरुसँग गरिएका सहमति उल्लंघन गरेर संविधान बनाइएकाले आफ्नो पार्टीले सुरुदेखि नै संविधान त्रुटिपूर्ण छ भन्दै संशोधन हुनुपर्ने माग राख्दै आएको ठाकुरले स्मरण गरे ।
ठाकुरले संसद पुनर्स्थापना नभएर चुनावमा जानु परे पनि आफ्नो पार्टी त्यसको लागि तयार रहेको स्पष्ट पारे ।
प्रधानमन्त्री ओली र अहिलेको संरकार संघीयता विरोधी भएको आरोप लगाउँदै ठाकुरले हालको संघीय संरचनाप्रति पार्टीको असहमति कायमै रहेको बताए ।
जनसंख्याको आधारमा निर्वाचन क्षेत्र र राज्य पुनःसंरचना आयोगको प्रतिवेदनका आधारमा प्रदेशहरुको सीमांकन र नामांकन हुनुपर्ने आफूहरुको माग यथावत रहेको ठाकुरले बताए ।
