काठमाडौं महानगरपालिकाले बेरोजगारलाई रोजगारी दिने, वडा कार्यालयमा सम्पर्क गर्न आग्रह
कोभिड-१९ का कारण बेरोजगार भएकाहरुलाई रोजगारी दिइने भन्दै काठमाडौं महानगरपालिकाले आफू बसोबास गरेको क्षेत्रको वडा कार्यालयमा सम्पर्क राख्न आग्रह गरेको छ ।
महानगरपालिकाले सार्वजनिक सूचना जारी गर्दै रोजगारी गुमाएका श्रम गर्न सक्ने महानगरवासीलाई जीवन निर्वाहका लागि पारिश्रमिक कार्यविधि, २०७७ बमोजिम रोजगारी उपलब्ध गराइने भएकोले सम्पर्क गर्न जानकारी दिएको हो ।
असहाय, अशक्त तथा शारीरिक रूपमा काम गर्न नसक्नेहरूलाई भने खान, बस्न र स्वास्थ्य उपचारका लागि मानव सेवा आश्रममा व्यवस्था मिलाइएको महानगरपालिकाले जनाएको छ । त्यस्ता व्यक्तिहरूले नजिकका वडा कार्यालयमा वा सीधै मानव सेवा आश्रममा सम्पर्क गर्न सक्ने महानगरपालिकाले जारी गरेको सूचनामा उल्लेख छ ।
स्वास्थ्य जोखिम, सङ्क्रमणको सम्भावना, सामाजिक प्रतिष्ठा तथा मानव अधिकारको संरक्षण गर्ने भन्दै महानगरपालिकाले आगामी मङ्सिर २ गतेदेखि सार्वजनिक स्थलमा खाना खुवाउने कार्यमा रोक लगाएको छ ।
यसअघि परोपकारी केही संस्थाहरूले काठमाडौँको खुलामञ्चमा बेरोजगार, असहाय र अशक्त व्यक्तिहरूका लागि खाना खुवाउने काम गर्दै आएका थिए ।
अन्य बन्द संरचनाभित्र स्वास्थ्य मापदण्ड पालना गरी भोजन सेवा सञ्चालन गर्न महानगरपालिकाले सबै सामाजिक सङ्घ संस्थाहरूलाई अनुरोध गरेको छ ।
यस कार्यमा वडा कार्यालयबाट आवश्यक समन्वय तथा सहयोग हुने काठमाडौँ महानगरपालिकाले जनाएको छ ।
