गायिका लता मंगेशकर बस्ने भवन कोरोना संक्रमणबाट जोगिन सिल
भारतीय गायिका लता मंगेशकर बस्ने निवास कोरोनाको संक्रमण हुन नदिन सिल गरेको छ ।
कोरोना सावधानी अपनाउँदै बृहन्मुम्बई नगरपालिका निगम (बीएमसी) ले मंगेशकरको घर सिल गरेको हो ।
गायिका र उनको परिवार सुरक्षित रहेको र महामारीविरुद्ध पूर्व-सावधानी स्वरुप मात्रै भवन सिल गरिएको मंगेशकर परिवारले विज्ञप्ति जारी गर्दै जनाएको छ ।
विज्ञप्तिमा लेखिएको छ, “हामीले प्रभाकुञ्ज (भवन) सिल गरिएको जिज्ञासाले भरिएका फोनकलहरु पाइरहेका छौं । घरमा हामी ज्येष्ठ नागरिकहरु मात्रै भएकाले बिल्डिङ सोसाइटी र बीएमसीले महामारी संक्रमण हुनुअगावै आवश्यक सुरक्षाको सावधानी स्वरुप भवन सिल गरेको हो । सामाजिक दूरी कायम गर्नुपर्ने भएकाले हामीले यसपालिको गणेशा पनि परिवारका सदस्यहरुको बीचमा मात्रै साधारण रुपमा गर्यौं ।”
साथै विज्ञप्तिमा मंगेशकर परिवारको स्वास्थ्य अवस्थाबारे अनावश्यक र झुटो खबर नफैलाउन पनि आग्रह गरिएको छ ।
