मेट्रो कन्ट्रोलमा कार्यरत तीन जना प्रहरीलाई कोरोना संक्रमण
महानगरीय प्रहरी कार्यालय रानीपोखरीस्थित मेट्रो कन्ट्रोलमा कार्यरत तीन जना प्रहरीमा कोरोना पुष्टि भएको छ ।
फोन गर्दा पैसा नलाग्ने प्रहरीको १०० नम्बरमा कार्यरत तीन प्रहरी जवानमा कोरोना पुष्टि भएको प्रहरी कार्यालय रानीपोखरीले जनाएको छ ।
मेट्रो कन्ट्रोलमा १ सय जना प्रहरी कार्यरत रहेको महानगरीय प्रहरी कार्यालयले जनाएको छ । उक्त मेट्रो कन्ट्रोलमा २४ घण्टा नै प्रहरी परिचालन भएका हुन्छन् ।
संक्रमित व्यक्तिहरुको निकट सम्पर्कमा रहेकालाई पीसीआर परीक्षणको तयारी गरिएको छ ।यसअघि रानीपोखरीमै कार्यरत एक जना प्रहरीमा पनि कोरोना संक्रमण देखिएको थियो ।
यसैगरी नेपाल प्रहरीको पहरा गण सामाखुसी र नगर प्रहरी एक जनामा पनि कोरोना संक्रमण देखिएको छ । नगर प्रहरीलाई ज्वरो आएपछि परीक्षण गराउँदा कोरोना संक्रमण पुष्टि भएको थियो ।