ट्रकको ठक्करबाट भक्तपुरमा पैदलयात्रुको मृत्यु
भक्तपुर : भक्तपुर नगरपालिका-९ च्यामासिंहबाट ब्रम्हायणीतर्फ जाँदै गरेको बा५ख ३८३९ नंको निशान ट्रकले ठक्करबाट एक पैदलयात्रुको मृत्यु भएको छ ।
ट्रकको ठक्करबाट रामेछाप सुनपाती गाउँपालिका-३ घर भई हाल भक्तपुर नगरपालिका-९ च्यामासिंह बस्ने ३५ वर्षीय चन्द्रबहादुर मोक्तानको गएराति मृत्यु भएको महानगरीय प्रहरी परिसर, भक्तपुरले जानकारी दिएको छ ।
ट्रकले पैदलयात्रु मोक्तानलाई हिजो राति ७ बजे दिएको ठक्करबाट घाइते मोक्तानको मध्यपुर अस्पताल ठिमीमा उपचारको क्रममा राति मृत्यु भएको प्रहरी नायब उपरीक्षक रेवतीरमण पोखरेलले जानकारी दिए ।
सिन्धुपाल्चोक सुनकोशी गाउँपालिका-२ घर भई हाल भक्तपुर १० कमलविनायक बस्ने ३१ वर्षीय चालक राजु नेपालीलाई महानगरीय प्रहरी वृत्त जगातीमा राखी कारबाही प्रक्रिया अगाडि बढाएको प्रहरीले जानकारी दिएको छ ।
