२० वर्षपछि उत्कृष्ट सुरुवात गरेको क्रेएशिया आज अर्जेन्टिनाबिरुद्धको भिडन्तमा
विश्वकपमा २० वर्षपछि उत्कृष्ट सुरुवात गरेको क्रेएशिया आज अर्जेन्टिनाबिरुद्धको भिडन्तमा पक्कै पनि अर्जेन्टिनाभन्दा कम दबाबमा उत्रनेछ ।
संयोग नै मान्नुपर्छ, सन् १९९८ मा आफ्नो पहिलो विश्वकप यात्रा थालनी गर्दा क्रेएशियाले समूह चरणमा अर्जेन्टिनासँग नै प्रतिस्पर्धा गरेको थियो र उक्त खेलमा १–० ले पराजित भएको थियो । उक्त विश्वकपमा सेमिफाइनल पुगेर क्रेएशियाले तेस्रो स्थान हासिल गर्दा अर्जेन्टिनाको यात्रा अन्तिम–१६ मै टुंगिएको थियो । त्यसपछि मैत्रिपूर्ण खेलमा एक–अर्काविरुद्ध प्रतिस्पर्धा गरे पनि विश्वकपमा यी दुई टोली भिडेका छैनन् ।
यसपटक विश्वकपमा अर्जेन्टिनालाई बलियो आँकिएको थियो भने क्रेएशियालाई कमजोर । तर, अर्जेन्टिनालाई पहिलो खेलमा आईसल्यान्डले एक–एक गोलको बराबरीमा रोकेको छ । यता, क्रेएशियाले आफ्नो पहिलो खेलमा नाइजेरियालाई २–० ले हराएको छ । त्यसैले स्पष्ट छ, अर्जेन्टिना जित चाहन्छ । क्रेएशियाका लागि बराबरी नतिजा पनि जित सरह नै हुनेछ ।
लियोनल मेस्सीलाई रोक्न क्रेएशियालाई सहज छैन । अर्जेन्टिनी प्रशिक्षक सम्पाओलीले टोलीमा धेरै परिवर्तन गर्दैछन् । रणनीतिक रुपमा र खेलाडीमा पनि । यसले क्रेएशियालाई थप गाह्रो पार्नेछ किनकी अर्जेन्टिनाको बेञ्चमा पनि उत्कृष्ट खेलाडीहरु छन् ।
एजेन्सी
