Logo
१० मंसिर २०७९, शनिबार
(March 10, 2017)

‘सामाजिक उत्तरदायित्वका लागि पत्रकारिता’

गौतमलाई सहीद घोषणा गरि सम्मानपूर्वक अन्तेष्टी गर्ने तयारी

काठमाडौं, फागुन २७ ।  सरकारले भारतीय सीमा सुरक्षा बल (एसएसबी) ले चलाएको गोली लागेर मृत्यु भएका गोबिन्द गौतमलाई सहीद घोषणा गरि सम्मानपूर्वक अन्तेष्टी गर्ने तयारी गरेको छ । कञ्चनपुर घटनाको विरोधमा माओवादी केन्द्रको सात नम्वर प्रदेशका टोलीको ज्ञापन पत्र बुझेपछि प्रधानमन्त्री सरकारको धारणा बताउदै उक्त कुरा बताएका हुन् ।

साथै गौतमको परिवारलाई १० लाख दिने निर्णय र उनको बालबच्चालाई पठनपाठनको व्यवस्था राज्यले गर्ने निर्णय भएको बताएका छन् । नेपाली भूमिमा निर्माण गरिएको कल्र्भट बनाउन रोक लगाउँदै नेपाली नागरिक कुट्ने भारतीय सीमा सुरक्षा फौज एसएसबी विरुद्ध उत्रिदा स्थानीय गोबिन्द गौतमको मृत्यु भएको थियो । कम्मरमा गोली लागेर गम्भीर घाइते भएका उनलाई धनगढीस्थित सिपी अस्पतालमा पुर्‍याएलगत्तै डाक्टरले मृत घोषणा गरेका थिए ।

यस्तो छ प्रधानमन्त्रीको धारण: 

प्रधानमन्त्री पुष्पकमल दाहाल ‘प्रचण्ड’ले नेपाल एक स्वतन्त्र र स्वाभिमानी राष्ट्र भएकाले स्वतन्त्र राष्ट्रमाथिको हस्तक्षेप कुनै हालतमा मान्य नहुने बताउनु भएको छ । फागुन २६ गते कञ्चनपुरको पूनर्बासमा भारतीय सुरक्षा फौजको आक्रमणमा परी मृत्यु भएका गोविन्द गौतमका पक्षमा ज्ञापनपत्र बुझाउन आएको माओवादी केन्द्रको प्रतिनिधि मण्डलसँगको भेटमा प्रधानमन्त्रीले कुनै पनि हस्तक्षेप स्वीकार नहुने बताउनु भएको हो ।

प्रधानमन्त्रीले भन्नुभयो, ‘कञ्चनपुर घटनामा सरकारले ध्यान दिएन भन्ने प्रचार पूर्णतः गलत हो । घटना घटेलगत्तै भारतीय दूताबासका कर्मचारी बोलाएर मैले घटनाको अनुसन्धान र कार्वाहीका लागि निर्देशन दिएको छु । परराष्ट्र मन्त्रालयले लगातार कुटनीतिक सम्वाद गरिरहेको छ । गृह मन्त्रालय र परराष्ट्र मन्त्रालयबाट विज्ञप्ति जारी गरेर घटनाप्रति खेद प्रकट गरिएको छ । आज नै घटनाको विषयमा माननीय गृहमन्त्रीजीले संसदमा सम्बोधन गर्दै हुनुहुन्छ । दोषीलाई कार्वाही गर्न सरकार प्रतिवद्ध छ । नेपाल एक स्वतन्त्र र सार्वभौम राष्ट्र हो । हाम्रो स्वाभिमानमाथि हुने कुनै पनि हस्तक्षेप र आक्रमण हामीलाई मान्य छैन ।’

घटनाको बारेमा आफू जानकार रहेको बताउँदै प्रधानमन्त्रीले समस्या समाधानका लागि सरकार निरन्तर लागिरहेको बताउनु भयो । प्रधानमन्त्रीले भन्नुभयो, ‘स्थितिको बारेमा मैले लगातार स्थानीय प्रशासन र राजनीतिक दलका नेताहरुसँग कुरा गरिरहेको छु । गोविन्द गौतमलाई शहिद घोषणा गर्ने प्रक्रिया अगाडि बढेको छ । परिवारलाई तत्काल १० लाख राहत र गौतमका २ छोरीको शिक्षादीक्षाको व्यवस्था सरकारले गर्ने निर्णय गरिएको छ ।

घटनाको गम्भीर रुपले छानविन हुन्छ र दोषीमाथि कार्वाही हुन्छ । यसमा सरकार गम्भीर मात्रै होइन, निकै संवेदनशील छ ।’ माओवादी केन्द्र सात नम्वर प्रदेशका ईन्चार्ज लेखराज भट्टद्वारा बुझाएको ज्ञापनपत्रमा गोविन्द गौतमलाई राष्ट्रिय शहिद र सम्मान गर्न, मृतकका परिवारलाई ५० लाख राहतको व्यवस्था गर्न, घाइतेहरुको निशूल्क उपचार गर्न, दोषीहरुमाथि अन्तर्राष्ट्रिय अदालतमा गएर भएपनि सजाय गर्न, गोविन्द गौतमको शालिक स्थापना गर्न, परिवारलाई शिक्षा, स्वास्थ्य र रोजगारीको व्यवस्था गर्न माग गरिएको छ ।

प्रकाशित मिति: Mar 10, 2017

प्रतिक्रिया दिनुहोस्