खेलकुद पत्रकार मञ्चको अध्यक्षमा आचार्य
मञ्चको शनिवार काठमाडौंमा भएको १२ औँ साधारण सभाले आचार्यको अध्यक्षतामा नयाँ कार्यसमिति चयन गरेको हो । अध्यक्षमा निर्बिरोध निर्वाचित भएका आचार्य मञ्चका पूर्वमहासचिव हुन्।
यस्तै मञ्चको बरिष्ठ उपाध्यक्षमा नेपाल टेलिभिजनका दुर्गानाथ सुवेदी (देवेन्द्र) निर्विरोध निर्वाचित भए। दुई उपाध्यक्षमा भने सहमति जुट्न नसकेपछि निर्वाचन भएको थियो ।
निर्वाचनबाट एनटीभी प्लसका सञ्जिव शिल्पकार र नयाँ पत्रिका दैनिकका श्रीलोचन राजोपाध्याय निर्वाचित भए।
मञ्चको महासचिवमा नागरिक दैनिकका प्रकाश तिमिल्सिना निर्विरोध निर्वाचित भए। यस्तै सचिवमा कान्तिपुर दैनिकका राजु घिसिङ र कोषाध्यक्षमा रिपब्लिका दैनिकका प्रज्वल वली निर्विरोध निर्वाचित भएको खेल पत्रकार पवन आचार्यले जानकारी दिए।
यसैगरी सदस्यहरुमा नागरिक दैनिकका कमल खत्री, दी राइजिङ नेपालका अन्जन खड्का, काठमाडौं पोष्टका आदर्श ढकाल र अन्नपूर्ण पोस्टका गोविन्द रेग्मी निर्विरोध निर्वाचन भएका छन्।
मञ्चले आफ्नो १२ औँ साधारण सभाको अवसरमा बरिष्ठ पत्रकार गोपाल बस्नेतलाई नेपाल खेलकुद पत्रकार मञ्च पत्रकारिता पुरस्कारबाट सम्मान पनि गरेको छ।
