भारतमा कोरोनाबाट ७७ जनाको मृत्यु, ३३ सयभन्दा बढी सङ्क्रमित
बर्तमान समयमा कोरोना भाइरसले विश्वलाई नै आतंकित बनाइरहेको अवस्थामा छिमेकी देश भारतमा कोरोना भाइरसबाट मृत्यु हुने र सङ्क्रमितको सङ्ख्या लगातार बढिरहेको छ ।
केन्द्रीय स्वास्थ्य मन्त्रालयका अनुसार भारतमा कोरोनाबाट सङ्क्रमित हुनेको सङ्ख्या ३ हजार ३ सय ७४ पुगेको छ भने अहिलेसम्म ७७ जनाको मृत्यु भएको छ ।
केन्द्रीय स्वास्थ्य मन्त्रालयले कोरोना भाइरस सङ्क्रमितको नयाँ तथ्याङ्क सार्वजनिक गरेको छ । कोरोना सङ्क्रमितमध्ये अहिलेसम्म २ सय ६६ जना निको भएको अधिकारीहरुले बताएका छन् । भारतमा आइतबार ३ जनाको मृत्यु भएको छ ।
कोरोना कारण विश्वभर १२ लाखभन्दा धेरै मानिस सङ्क्रमित भएका छन् भने ६४ हजारभन्दा धेरैको ज्यान गइसकेको छ । त्यस्तै २ लाख ४६ हजार ६ सयभन्दा बढी निको भएका छन् ।