कोरोना : विश्वव्यापी महामारीको चिन्ता बढ्यो, कहाँ कति छ मारिने र मर्नेको संख्या ?
विश्वभरि नयाँ सङ्क्रमणका सङ्ख्या बढ्दै गर्दा कोरोना भाइरसको प्रकोपले विश्वव्यापी महामारीको स्वरूप लिने चिन्ता बढेको छ।
हालसम्म अधिकांश सङ्क्रमण चीनभित्र नै पाइएको छ तर दक्षिण कोरिया, इटली र इरानजस्ता देशहरू कोभिड-१९ भनिने स्वासप्रस्वासको रोग गराउने उक्त भाइरसको संक्रमण रोक्न संघर्षरत छन्। अहिलेसम्म कोरोनाभाइरस संक्रमण रोक्ने कुनै खोप उपलब्ध छैन।
कहाँ कति छ कोरोनाभाइरस ?
चीनमा सङ्क्रमितहरूको सङ्ख्या ७७,००० नाघेको छ। त्यहाँ झन्डै २,६०० मानिसको ज्यान गइसकेको छ। चीनबाहेक अन्य २६ देशमा उक्त रोग फैलिएको र त्यसले १२ सय मानिस सङ्क्रमित भइसकेको अनि ८ जनाको ज्यान गइसकेको विश्व स्वास्थ्य संगठन डब्लूएचओले जनाएको छ।
सोमवार अफगानिस्तान, कुवेत र बाहरेनले ती देशमा पहिलो कोरोना भाइरस संक्रमण पाइएको जनाए। ती सबै घटनामा इरानबाट फर्किएमा मानिसमा सो संक्रमण भेटिएको हो।
’रोक्ने अवसर साँघुरिँदै’
यसअघि डब्लूएचओका प्रमुख टेड्रस एड्हानोम गेहब्रेयससले भाइरस संक्रमण रोक्ने अवसर ’साँघुरिँदै गएको’ चेतावनी दिएका थिए।
युकेको इस्ट एङ्ग्लिया विश्वविद्यालयका स्वास्थ्य सुरक्षासम्बन्धी प्राध्यापक पाउल हन्टरले पनि चीनभन्दा बाहिर बढ्दो सङ्क्रमण ’अत्यन्त चिन्ताजनक’ भएको बताए।
दक्षिण कोरियामा राष्ट्रपति मुन जे(इनले मानिसहरूलाई सरकारले क्वारन्टीनबारे चालेका कदमहरूमा विश्वास गर्न आह्वान गरेका छन्।
त्यहाँ चीनभन्दा बाहिर सबभन्दा धेरै संख्यामा (झन्डै ८००) संक्रमित भेटिएका छन्। सातजनाको ज्यान गएको छ।
इरानमा १२ को मृत्यु
इरानमा कोरोनाभाइरसबाट मारिनेको संख्या १२ पुगेको छ भने इटलीमा चारजना मारिएका छन्।
स्वास्थ्य सम्वाददाता फर्गुस वाल्सले दक्षिण कोरिया, इरान र इटलीमा देखिएका अवस्थालाई समग्रमा हेर्दा त्यसले विश्वव्यापी महामारीको सुरुवाती चरणतर्फ इंगित गर्ने बताए।
ती तीनवटै देशमा चीनसँग असम्बन्धित कोरोना भाइरस संक्रमण फैलिरहेको छ।
इटलीमा चीनमाजस्तै नियन्त्रणका उपाय अपनाइएका छन् भने इरानको स्थिति विशेषगरी चिन्ताजनक रहेको वाल्सले उल्लेख गरेका छन्।
