नेकपा-राजपाको गठबन्धनमा संघीय समाजवादी पार्टी पनि सामेल
नेपाल कम्युनिस्ट पार्टी (नेकपा), राष्ट्रिय जनता पार्टी नेपाल (राजपा) र नेपाल संघीय समाजवादी पार्टी (नेससपा) बीच दुईबुँदे सहमति भएको छ ।
तीन दलबीच आगामी दिनमा राजनीतिक सहकार्य जारी राख्ने सहमति पनि भएको छ । नेकपा र राजपाले यसअघि नै चुनावी तालमेल गरेर प्रदेश २ का चार सिटमा २-२ उम्मेदवार उठाएका छन् ।
आसन्न राष्ट्रियसभा निर्वाचनलाई लिएर तीन दलबीच आइतबार दुईबुँदे सहमति भएको हो । सहमतिअनुसार नेपाल संघीय समाजवादी पार्टीले राष्ट्रियसभा निर्वाचनमा नेकपा-राजपा गठबन्धनका उम्मेदरवारहरुलाई समर्थन गर्नेछ ।
नेकपाले महिलातर्फ तुलसाकुमारी दाहाल र दलिततर्फ राधेश्याम पासवान तथा राजपाले अन्यतर्फ मृगेन्द्रकुमार सिंह यादव र अल्पसंख्यकतर्फ शेखरकुमार सिंहलाई उम्मेदवार बनाएको छ ।
प्रदेश २ को प्रदेशसभामा रिजवान अन्सारी नेतृत्वको नेपाल संघीय समाजवादी पार्टीका एक प्रदेशसभा सदस्य छन् ।
