सैनामैनामा आयोजित ‘मम्मी डान्स प्रतियोगिता’को उपाधि कल्पनालाई
रुपन्देहीको सैनामैनामा आयोजित मम्मी डान्स प्रतियोगिताको उपाधि कल्पना डुम्रे ज्ञवालीले जितेकी छन् ।
चौंथो राष्ट्रिय सैनामैना कृषि ,पर्यटन तथा औद्योगिक व्यापार महोत्सवमा भएको मम्मी डान्स प्रतियोगितामा १७ जना प्रतिस्पर्धीलाई पछि पार्दै बुटवलकी कल्पनाले उक्त उपाधि जितेकी हन् ।
उनलाई ताज, नगद २० हजार रुपैयाँ, प्रमाणपत्रसहित सम्मानपत्र प्रदान गरिएको छ ।
सैनामैना उद्योग वाणिज्य संघका अध्यक्ष राजबहादुर क्षेत्री, नेपाली कांग्रेस सैनामैना नगर सभापति रामप्रसाद अधिकारी, संघका महासचिव दिपक अधिकारी ,संघका सचिव हिमाल गैरे, डान्स प्रतियोगिताकी संयोजक चन्दा भण्डारीलगायतले पुरस्कार प्रदान गरे । प्रतियोगितामा रुद्रपुरकी अस्मिता थापा द्वितीय र बुटवलकी सोनी सेन्जाली तृतीय सफल भए ।
उनीहरूले क्रमशस् नगद १५ हजार र १० हजार नगदसहित प्रमाणपत्र प्राप्त गरे । प्रतियोगितामा १७ सहभागीमध्येबाट पहिलो दिनको नाचबाट १० जना दोस्रो चरणका लागि छनोट भएका थिए ।
डुम्रे यसअघि बुटवल उद्योग वाणिज्य संघको आयोजनामा बुटवल देवीनगरमा भएको २० औं संस्करणको औद्योगिक व्यापार मेलाको आमा नृत्य प्रतियोगितामा द्वितीय भएकी थिइन् ।
त्यस्तै महोत्सवमा,राष्ट्रिय कलाकार पशुपति शर्मा, रितु थापा,शारदा पगेनी, पुरुषोतम पौडेल, रविना बस्याल लगायतको प्रस्तुति,डान्स आइडलसमेत भएको सांस्कृतिक उपसमिति संयोजक हिमाल गैरेले बताए ।
२ सय २० स्टल रहेको मेलामा करीब २ लाख ५० हजारले अवलोकन गर्ने र ५ करोड बराबरको करोबार गर्ने लक्ष्य रहेको सैनामैना उद्योग बाणिज्य संघका महासचिव दिपक अधिकारीले जानकारी दिए ।
राष्ट्रिय ‘आर्थिक विकासका राष्ट्रिय आधार, कृषि पर्यटन उद्योग र व्यापार’ भन्ने मुल नाराका साथ सञ्चालन भएको महोत्सव माघ ६ गतेसम्म चल्ने हुने प्रचारप्रसार संयोजक लोकनाथ अधिकारीले बताए ।
