चन्द्रमा जाने यात्रीका लागि नासाले बनायो यस्तोे स्पेस सूट
अमेरिकी : अन्तरिक्ष एजेन्सी नासाले चन्द्रमा जाने यात्रीका लागि नयाँ स्पेस सूट तयार पारेको छ । ‘सिंगल साइज फ्लेक्सिबल स्पेस सूट’ नामक स्पेस सूट अन्तरिक्ष यात्रीले लगाउने गरी नासाले यसै साता सार्वजनिक गरेको हो ।
चन्द्रमाको दक्षिणी ध्रुवमा अहिलेसम्म मानवले पाइला नटेको हुँदा नासाले २०२४ मा पहिलो पटक अमेरिकी अन्तरिक्ष यात्री पठाउने तयारी गरिरहेको छ । त्यही मौकामा यस स्पेस सूटको प्रयोग गरिने बताइएको छ ।
नासाले सार्वजनिक गरेको नयाँ स्पेस सूटको विशेषता भनेको यसलाई सिंगल साइजमा डिजाइन गरी बनाइएको छ । यसलाई कुनै पनि कदका अन्तरिक्ष यात्रीले पहिरन सक्छन् । किन भने यसलाई कुनै पनि साइजमा मिलाउन सकिन्छ ।
यसका साथै अन्तरिक्ष यात्रीलाई चन्द्रमाको सतहमा जटिल कार्य गर्न पनि सहयोग पुग्ने छ । यस्तै प्रतिकुल वातावरणमा पनि यो स्पेस सूटले अन्तरिक्ष यात्रीको सुरक्षा गर्ने छ ।
यद्यपि, नासाले यो नयाँ स्पेस सूटलाई भने नमूनाको रुपमा मात्रै सार्वजनिक गरेको हो । यो पछिल्लो पुस्ताको स्पेस सूटको सबैभन्दा महत्वपूर्ण विशेषता भनेको यसको लचिलोपन अर्थात लचकता र टिकाउ नै हो ।
कठिन परिस्थितिमा पनि यसले अन्तरिक्ष यात्रीलाई सहजता प्रदान गर्ने नासाको दावी छ । नासाले तयार पारेको यो नयाँ स्पेस सूटलाई पहिरन पनि सहज हुने र यसलाई थुप्रै अलगअलग साइजको पार्ट मिलाएर बनाइएको छ ।
यस्तै यो स्पेस सूटमा कुनै पनि जिप अर्थात तारको प्रयोग गरिएको छैन । यसको सबै मुख्य पार्टपुर्जालाई सील गरिएको छ ।
यसैगरी यसमा पोर्टेबल लाइफ सपोर्ट सिस्टम पनि रहेको छ । जसमा पावर सोर्स, वाटर कुलिङ सिस्टम, टु-वे रेडियो जडान गरिएको छ । यस्तै कार्बनडाइअक्साइड अब्जर्ब गर्ने असीमित क्षमता छ भने ६ दिनसम्म अन्तरिक्ष यात्रीका लागि पूर्ण रुपमा लाइफ सपोर्ट मिल्ने छ ।
