राष्ट्रपतिको विरोधमा तरुण दलको प्रर्दशन, न्युन जनसहभागिता
नेपाली कांग्रेसका सभापति शेरबहादुर देउवालाई राष्ट्रपति विद्यादेवी भण्डारीले अमर्यादित बोलेको भन्दै कांग्रेसनिकट तरुण दलले विरोध प्रर्दशन गरेको छ ।
यद्यपी प्रर्दशनमा जनसहभागिता भने खासै देखिएन । तरुण दलबीचको आन्तरिक द्धन्द्धको प्रत्यक्ष प्रभाव देखिएको बताइएको छ । यसअघि दलका महासचिव भुपेन्द्रजंग शाहीले विशाल प्रर्दशन गर्ने बताएका थिए ।
आइतवार दिउँसो राजधानीस्थित माइतीघर मण्डलामा विरोध प्रर्दशन गरेका हुन् । एउटै मंचमा उपस्थित भएका कांग्रेस सभापति देउवा बोलेको नबुझिएको भन्दै र राष्ट्रपति भण्डारीले अपमान गरेको आरोप तरुण दलले लगाएको छ ।
शुक्रवार राजधानीको राष्ट्रिय सभागृहमा गणेशमान सिंह जनआन्दोलन स्वर्ण पदक विभूषण तथा अभिनन्दन कार्यक्रममा अतिथिका रूपमा उपस्थित भएकी राष्ट्रपति भण्डारीले मंचमा वक्ताले बोलेको केही नबुझिएको टिप्पणी गरेकी थिइन् ।
‘यो मञ्चमा वक्ताले बोलेको केही बुझिँदोरहेनछ,’ राष्ट्रपति भण्डारीले भनेकी थिइन्, ‘नेताहरू जोसिएर बोल्नुभयो । फ्लोरबाट एकदम स्वागत भयो, ताली बज्यो । राम्रो बोल्नुभएको होला भन्ने चाहिँ लाग्यो । तर मैले बुझिन ।’