उपचारका लागि प्रधानमन्त्री ओली सिंगापुरमा रहेका बेला प्रचण्डद्वारा राजनीतिक भेटघाटमा तीव्रता
काठमाडौंः सत्तारुढ नेपाल कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ले राजनीतिक भेटघाटलाई तीव्र बनाएका छन् ।
प्रधानमन्त्री एवम् नेकपाका अर्का अध्यक्ष केपीशर्मा ओली स्वास्थ्य उपचारको लागि सिंगापुरमा रहेका बेला अर्का अध्यक्ष प्रचण्डले राजनीतिक भेटघाट तीव्र बनाएका हुन् ।
नेकपा अध्यक्ष प्रचण्डले आइतबार राष्ट्रपति विद्यादेवी भण्डारीसँग एक घण्टासम्म छलफल गरेका छन् । बिहान ९ बजे शितलनिवास प्रवेश गरेका प्रचण्ड १० बजेमात्र बाहिरिएका थिए ।
प्रचण्डले कार्यवाहक प्रधानमन्त्री एवम् पार्टीका अर्का प्रभावशाली नेता ईश्वर पोखरेलसँग पनि छलफल गरेको स्रोतको दावी रहेको छ । राष्ट्रपति भण्डारी र कार्यवाहक प्रधानमन्त्री पोखरेलसँग के विषयमा कुराकानी भयो भन्नेबारे भने खुलेको छैन ।
तर, प्रचण्डको सचिवालयले भने दुवै भेटघाटमा समसामयिक राजनीतिबारे छलफल भएको जनाएको छ ।
