Logo
१६ जेठ २०७७, शुक्रबार
(June 24, 2019)

‘सामाजिक उत्तरदायित्वका लागि पत्रकारिता’

भारतले बनाएको अग्लो सडकका कारण सीमावर्तीका अधिकांश गाउँ डुबानमा

बाँकेको सीमावर्ती ग्रामीण क्षेत्रमा दक्षिणतर्फ सीमामा भारतले बाँधजस्तो अग्लो सडक बनाएको छ । सो सडकका कारण नरैनपुरमा सयौँ नेपालीका घर डुबानमा परेका छन् ।

बाँधजस्तो सडक बनाउनाले पानीको सहज निकास हुन सकेको छैन जसका कारण सीमावर्तीका अधिकांश गाउँ डुबानमा परेको गाउँपालिका अध्यक्ष इस्तियाक अहमद शाहले बताए । बनियाँ गाउँ, महतनियाँ, मझेरटी, मियाँपुर्वा, घोरदौरिया, महादेवनगर, कोटिहा, बहावपुर्वा, रोशनपुर्वालगायतका गाउँका अधिकांश घर डुबानमा परेका छन् । सय भन्दा बढी घर डुबेको र झण्डै एक दर्जन घर भत्किएको अध्यक्ष शाहले जानकारी दिए ।

वर्षात्ले निर्माणाधीन हुलाकी राजमार्गमा पनि पानीले क्षति पुर्याएको छ । पुल, कल्भर्ट बनाइएका ठाउँमा पानीले बाटोको दुवैतिर कटान गरेको छ । गाउँपालिकाको वडा नम्बर १ कट्कुइँयास्थित वडा कार्यालयमा समेत पानी पसेको प्रमुख प्रशासकीय अधिकृत दलबहादुर बस्नेतले बताए । घरहरुमा पानी पसेपछि गाउँपालिका अध्यक्ष शाह नेतृत्वको टोली उद्धारमा खटिएको छ ।

अविरल वर्षापछि खहरे खोलामा आएको बाढी र आकाशे पानी घरहरुमा पसेको इलाका प्रहरी कार्यालय भोजभगवानपुरका प्रमुख प्रहरी निरीक्षक वीरेन्द्रवीर विश्वकर्माले जानकारी दिए ।

बाँकेमा आइतबार १६० दशमलव ८ मिलिमिटर वर्षा भएको हावापानी फिल्ड कार्यालय राँझाका निमित्त फिल्ड इञ्चार्ज पहलबहादुर विश्वकर्माले जानकारी दिए।

प्रकाशित मिति: ९ असार २०७६, सोमबार ११:४१

प्रतिक्रिया दिनुहोस्