Logo
June 20, 2019

‘सामाजिक उत्तरदायित्वका लागि पत्रकारिता’

३ महिलाको शृङ्खलाबद्ध हत्या, अझै पत्ता लागेन हत्यारा

खोटाङ : तीन महिलाको शृङ्खलाबद्ध हत्या भएको लामो समय बित्दासमेत खोटाङमा हत्यारा पत्ता लाग्न सकेको छैन ।

घटनालगत्तै जिल्ला प्रहरी कार्यालय खोटाङ तथा काठमाडौँबाट नेपाल प्रहरीको विशेष टोली आएर अनुसन्धान गरे पनि दोषी पत्ता लगाउन नसकेको हो । विसं २०७३ माघ २६ गते बुधबार बिहान खोटेहाङ गाउँपालिका-९ लिच्कीराम्चेकी १७ वर्षीया रीता तामाङ मृत फेला परेकी थिइन् भने २०७४ जेठ १६ गते हलेसी तुवाचुङ नगरपालिका-७ महादेवस्थानकी ५७ वर्षीया ज्ञानीमाया विश्वकर्मा र २०७४ साउन ४ गते जन्तेढुङ्गा गाउँपालिका-६ दिप्लुङकी ३७ वर्षीया देवी विश्कर्मालाई हत्या गरिएको अवस्थामा फेला पारिएको थियो ।

घटनामा संलग्न दोषी पहिचानका लागि अनुसन्धान जारी रहे पनि दोषी पत्ता नलाग्दा प्रहरीमाथि नै प्रश्न उठ्न थालेको छ । सिम्पानी बजारका होटल व्यवसायी शिव खड्काको होटलमा काम गर्दै आएकी रीताको शव कुसेऔँशी जङ्गलको बाटोभन्दा करीब ४० मिटर तल भिरमा भेटिएको थियो । घटनास्थलमा झारपात मडारिएको, शव घस्रिएको पाइएकाले युवतीलाई सामूहिक बलात्कारपछि हत्या गरिएको आशङ्का गरिएको छ। यस्तै, स्याउला काटेर घर फर्कनेक्रममा इलाका प्रहरी कार्यालय हलेसीभन्दा करीब पाँच मिनेटको पैदल दूरीमा ज्ञानीमायाको हत्या भएको थियो ।

माइतीघर जन्तेढुङ्गा गाउँपालिका-४ डम्वर्खुशिवालयबाट घर फर्कने क्रममा सम्पर्क्विहीन बनेको दोस्रो दिन फेला परेकी देवीको शव सडकभन्दा करीब ५०० मिटर तल कम्मरमुनि कपडा खोलिएको, टाउकोबाट रगत बगिरहेको अवस्थामा भेटिएको थियो। तीन महिलाको शृङ्खलाबद्ध हत्या भएपछि जिल्लास्थित महिला अधिकारकर्मीले तत्काल दोषी पत्ता लगाएर हत्यारालाई कानूनी कठघरामा ल्याउन प्रहरीलाई दबाब दिइरहेका छन् ।

जिल्लास्थित क्रियाशील महिला अधिकारकर्मीले पटक-पटक जिल्ला प्रहरी कार्यालय खोटाङमा पुगेर घटनाको विषयमा जानकारी मागिरहेका छन्। शृङ्खलाबद्ध हत्या प्रकरणका दोषी पत्ता नलागेको बारेमा गत भदौ १ गते गृहमन्त्री रामबहादुर थापालाई भेटेर जानकारीसमेत गराइएको थियो । नेपाल कम्युनिष्ट पार्टी (नेकपा)का अध्यक्ष देवान किराती ‘पृथ्वी’को नेतृत्वमा गएको टोलीले गृहमन्त्री थापालाई उहाँको निवासमा भेटेर तत्काल हत्यारा पत्ता लगाएर कारबाही गर्न माग गरेको थियो ।

खोटाङे नेताहरुको टोलीसँगको भेटमा गृहमन्त्री थापाले आफू उक्त घटनाप्रति गम्भीर रहेको बताए । उनले चाँडै नै परिणाम आउने गरी आफूले कारवाहीको प्रक्रिया अगाडि बढाउन सम्बन्धित निकायलाई निर्देशन दिइसकेको बताए पनि अहिलेसम्म दोषी पत्ता लाग्न सकेको छैन। यसबीचमा जिल्ला प्रहरी कार्यालय खोटाङमा चार प्रहरी प्रमुख फेरिए। प्रहरी नायप उपरीक्षक (प्रनाउ) नवीनकिशोर प्रधान, लोकदर्शन थापा र राजकुमार केसी सरुवा भएर अन्यत्र गइसकेका छन् ।

अहिले प्रनाउ वामदेव गौतम आएर प्रमुखको जिम्मेवारी सम्हालेका छन् । तीन महिला हत्या प्रकरणका बारेमा आफू प्रहरी प्रमुख भएर खोटाङ आउनासाथ अनुसन्धान थालेको प्रनाउ गौतमले बताए । ‘अहिले फाइल अध्ययन गरेर घटनाको बारेमा बुझ्ने काम गरिरहेको छु’, उनले भने, ‘तत्काल दोषी पत्ता नलागे पनि उम्कनेवाला छैन, पुरानो घटना भएकाले केही समय लाग्न सक्छ ।’ जिल्लामा सरुवा भएर आउने सबै प्रहरी प्रमुखलाई घटनाबारे जानकारी गराइएको महिला अधिकारकर्मी एवं पूर्वसभासद् दुर्गाजयन्ती राईले बताइन्। ‘हामीले सबै सुरक्षा प्रमुखलाई घटनाका बारेमा जानकारी गराएका छौँ’, उले भनिन्, ‘अहिलेसम्म दोषी पत्ता नलाग्नुमा प्रहरीमाथि नै आशङ्का गर्नुपर्ने अवस्था आएको छ ।’ घटनाका दोषी पत्ता नलागेपछि मृतकका आफन्त प्रहरीप्रति आक्रोशित बनेका छन् ।

प्रकाशित मिति: ५ असार २०७६, बिहीबार १२:०२

प्रतिक्रिया दिनुहोस्