विश्वकप किकेटमा भारतको सहज जित, अस्ट्रेलिया ३६ रनले पराजित
भारतले इङ्ल्यान्डमा जारी आईसीसी एकदिवसीय विश्वकप क्रिकेटमा रोमाञ्चक जित हात पारेको छ । आइतबार राति भएको खेलमा भारतले साविक विजेता अस्ट्रेलियालाई ३६ रनले हरायो । भारतको यो लगातार दोस्रो जित हो ।
दी ओभल क्रिकेट मैदानमा भएको निकै प्रतिस्पर्धात्मक खेलमा भारतको जितमा शिखर धवनको शतक तथा कप्तान विराट कोहली र रोहित शर्माको अर्धशतक महत्वपूर्ण बनेको थियो ।
भारतले दिएको ३ सय ५३ रनको विशाल विजयी लक्ष्य पछ्याएको अस्ट्रेलियाले निर्धारित ५० ओभरमा सबै विकेटको क्षतिमा ३ सय १६ रन बनाएको थियो । अस्ट्रेलियाका लागि स्टेभन स्मिथ र प्रारम्भिक ब्याट्सम्यान डेभिड वार्नरले अर्धशसतीय इनिङ खेले । स्मिथले ६९ र वार्नरले ५६ रन बनाए । एलेक्स क्यारीले अविजित ५५, उस्मान ख्वाजाले ४२, कप्तान एरोन फिन्चले ३६ र ग्लेन म्याक्सवेलले २८ रन बनाए ।
भारतका जसप्रीत बुमराह र भुवनेश्वर कुमारले ३- ३ विकेट लिए । युजभेन्द्र चाहलले २ विकेट लिए ।
यसअघि टस जितेर पहिले ब्याटिङ गरेको भारतले निर्धारित ५० ओभरमा ५ विकेटको क्षतिमा ३ सय ५२ रन बनाएको थियो । भारतका लागि शिखर धवनले शतक तथा रोहित शर्मा र कप्तान विराट कोहलीले अर्धशतक बनाए ।
प्रारम्भिक ब्याट्सम्यान धवनले १ सय १७ रन बनाए । एकदिवसीय क्रिकेटमा धवनको यो १७औं शतक हो । यसैगरी विराटले ८२ र रोहितले ५७ रन बनाए । हार्दिक पाण्ड्याले ४८, महेन्द्रसिंह धोनीले २७ र लोकेश राहुलले ११ रन बनाए । अस्ट्रेलियाका मार्कस स्टोइनिक्सले २ विकेट लिए । प्याट कुमिन्स, मिचेल स्टार्क र नाथन कल्टर नाइलले १-१ विकेट लिएका थिए ।
लगातार दोस्रो जित हात पारेको भारतले यसअघिको खेलमा दक्षिण अफ्रिकालाई ६ विकेटले हराएको थियो । तीन खेल खेलेको अस्ट्रेलियाको यो पहिलो हार हो । अस्ट्रेलियाले यसअघि अफगानिस्तानलाई ७ विकेट र वेस्ट इन्डिजलाई १५ रनले हराएको थियो ।
