स्थानीय तहलाई एम्बुलेन्स र दमकल किन्न स्वीकृति प्रदान
हेटौँडा : प्रदेश नं ३ सरकारको मन्त्रिपरिषद् बैठकले स्थानीय तहलाई एम्बुलेन्स र दमकल खरीद गर्न स्वीकृति प्रदान गर्ने निर्णय गरेको छ । बैठकले हेटौँडा–१५ मा ‘अटो–भिलेज’ निर्माणका लागि हेटौँडा उपमहानगरपालिकालाई ३० वर्षे भोगाधिकार प्रदान गर्न सङ्घीय सरकारलाई सिफारिस गर्ने निर्णयसमेत गरेको छ ।
मुख्यमन्त्री डोरमणि पौडेलको अध्यक्षतामा बसेको मन्त्रिपरिषद् बैठकले आवश्यकताअनुसार प्रचलित कानूनबमोजिम स्थानीय तहलाई एम्बुलेन्स र दमकल खरीद गर्ने गरी स्वीकृति दिने निर्णय गरेको हो । स्थानीय तहलाई एम्बुलेन्स र दमकल खरीद गर्न प्रदेश सरकारले बजेट उपलब्ध गराउने निर्णय यसअघि नै गरेको थियो । सोही निर्णयअनुसार बजेट व्यवस्था गरिने सरकारका प्रवक्ता आन्तरिक मामिला तथा योजनामन्त्री कैलाश ढुङ्गेलले जानकारी दिनुभयो ।
