‘कुटेको देख्नु भएको छ?’प्रतिपश्न गर्दै मुख्यमन्त्री राउतले भने ‘विवाद मिलिसक्यो अहिले यत्ति लेखिदिनुस्’
काठमाडौँ : प्रदेश नम्बर दुईका मुख्यमन्त्री लालबाबु राउतले आफ्नो सरकारका मन्त्री र सचिवबिचको झापड प्रकरणमा कुरा मिलिसकेको बताएका छन् । घटनाको छानबिन गर्न प्रदेश सरकारले मन्त्रीको संयोजकत्वमा समिति गठन गरेका बेला मुख्यमन्त्री राउतले दुवैजनाबिचको असमझदारी मिलिसकेको बताए ।
तर मुख्यमन्त्री राउतले भने कुरा मिलिसकेको बताए । ‘मैले दुवैजनालाई बोलाएर कुरा गरेँ, केही असमझदारी भएको रहेछ, अहिले कुरा मिलिसक्यो, सबै ठीकठाक छ’, उनले भने ।
त्यसो भए छानबिन समितिले अब काम गर्दैन त भन्ने प्रश्नमा राउतले भने, ‘छानबिन समितिले आफ्नो काम गर्ला तर दुवैजनाको विवाद भने मिलिसकेको छ, अहिले यत्ति लेखिदिनुस् ।’
राउतले प्रदेश मन्त्रीले सचिव कुटेको घटनालाई सामान्यीकरणको प्रयास गरेका छन् । सचिव कुट्ने मन्त्रीलाई के कारबाही गर्नुहुन्छ भन्ने प्रश्नमा मुख्यमन्त्री राउतले ‘कुटेको तपाईंले देख्नु भएको छ’ भन्दै प्रतिप्रश्न गरे ।
‘घटना सामसुम भैसक्यो’, राउतले भने, ‘तपाईंहरू तिललाई पहाड नबनाउनुहोस् ।’ उनले घटना सामान्य विवादमात्र भएको बताए । ‘सचिवले नै केही भएको छैन भनिसक्नुभयो’, राउतले भने, ‘उहाँले केही भएको छैन भन्नुभयो ।’
प्रदेश २ का आर्थिक मामिला तथा योजना मन्त्री विजय यादवले उद्योग वन तथा पर्यटन मन्त्रालयका सचिव विद्यानाथ झामाथि आइतबार दिउँसो हातपात भएको साचार बाहिरिएका थिए । आफ्नो कार्यकक्षमै बोलाएर मन्त्री यादवले हातपात गरेको सचिव झाको आरोप छ ।
मेडपा नामक योजना आफूले भनेको एनजिओलाई नपारेको भन्दै मन्त्रीले कुटपिट गरेको सचिव झाले दाबी गरेकाछन् । उनले आफूलाई कुट्ने मन्त्रीलाई कानुनी कारबाही हुनुपर्ने माग गरेका छन् ।
घटना बाहिरिए संगै आइतबार साँझ बसेको मन्त्रीपरिषद बैठकले मन्त्रीले सचिवमाथि कुटपिट गरेको विषयमा छानबिन समिति बनाएको छ । आन्तरिक मामिला तथा योजना मन्त्री ज्ञानेन्द्र यादवको नेतृत्वमा ३ सदस्यीय छानबिन समिति गठन गरेको हो । जसमा आन्तरिक मामिला तथा योजना मन्त्रालयका प्रमुख सचिव र मुख्यमन्त्री तथा मन्त्रिपरिषद कार्यालयका सचिव सदस्य छन् ।
आफूले भनेका एनजिओलाई योजना नपारेको भन्दै मन्त्री यादवले मन्त्रालयका सचिवलाई झापड हानेका समाचार बाहिरिएका थिए । उद्यम कार्यक्रमका लागि आफ्नो एनजीओलाई छनौट नगरेको भन्दै मन्त्री यादवले आफूमाथि कार्यकक्षमै बोलाएर कुटपिट गरेको सचिव झाको भनाई छ ।
तर मन्त्री निवासमै सचिव झाले आफू लोकल भएको भन्दै निकै अमार्यदित भाषामा चर्को चर्को छाडा गाली बक्दै गरेको भिडियो सार्वजनिक भएको छ । भिडियोमा उनले निकै रुवाफका साथ मन्त्री यादवलाई अमार्यदित भाषामा गाली गलोज गरिरहेको सुन्न सकिन्छ ।
तर मन्त्री यादवले आफूले सचिवलाई नकुटेको दाबी गरेका छन् । कार्यकक्षमा दुर्व्यवहार गरेपछि प्रहरीलाई खबर गरेको उनको भनाई छ । प्रदेशका सभामुख र अर्का एकजना मन्त्रीको अगाडि ’म लोकल हुँ’ भन्दै सचिव झाले आफ्नो पदीय मर्यादा बिर्सिएर चर्को आवाजमा बोल्न थालेपछि केही विवाद भएको तर आफूले झापड नहानेको मन्त्री यादवको दाबी छ ।
यो पनि पढ्नुस् :
मन्त्री यादवले सचिव झालाई कुटेको घटनालाई छानविन गर्न अर्को मन्त्री यादवको संयोजकत्वमा टोली गठन
आफुले भनेको NGO लाई कार्यक्रम नपारेपछि सभामुखकै अगाडी यसरी मन्त्रीबाटै कुटिए सचिव (भिडियो सहित)
