Logo
|| January 10, 2019

‘सामाजिक उत्तरदायित्वका लागि पत्रकारिता’

मोटरबाटो ट्रयाक खुलेपछि डोल्पामा घट्यो चामलको मूल्य

जाजरकोट : जाजरकोट-डोल्पा मोटरबाटो ट्रयाक खुलेपछि डोल्पामा दैनिक उपभोग्य सामग्रीमा मुल्य घटेसँगै चामलको मूल्य पनि घटेको छ । यातायातको पहुँच बढेसँगै बजारमा पाइने चामलको मूल्य घटेपछि नेपाल खाद्य संस्थानको चामल महँगो भएको भन्दै नबिकेपछि संस्थानले नयाँ मूल्य निर्धारण गर्न केन्द्रसँग प्रस्ताव गरेको छ । जाजरकोट-दुनै मोटरबाटोको धेरै खण्डमा ट्र्याक खुलिसकेको छ ।

सुम्पानीदेखि दुनैसम्म मोटरबाटोको ट्रयाक खोल्ने कार्य सोमबारबाट शुरु भइसकेकाले ढुवानी र यात्राका लागि अझै सहज हुने भएपछि खाद्यको जापानी चामल महँगो भनी खरीद नभएको हो । जाजरकोट-दुनै सडकको ठाउँ ठाउँमा रहेका विभिन्न खोला र नदीमा पुल निर्माण नभएपनि खण्डखण्ड गरेर स्थानीयरूपमा जीप र ट्र्याक्टर चलेकाले यात्रा र ढुवानी खर्च पहिलेको भन्दा ३० प्रतिशतले घटेको व्यापारी गोपाल केसीले बताए ।

जिरामसिनोलगायत विभिन्न मसिनो चामल दुनै बजारमा प्रतिकेजी रु ५१ मा पाइने गरेको केसीको भनाइ छ । केही वर्ष अघि प्रतिकिलो रु ५५ मा पाइने जापानी चामल नेपाल खाद्य संस्थानले गत आर्थिक वर्षमा मूल्य बढाएर प्रतिकिलो रु ६५ पु¥याएको थियो । सो मूल्य महँगो भएको भन्दै सर्वसाधारणले चामल खरीद नगरेपछि मूल्य घटाएर प्रतिकेजी रु ६१ मा झारिएको र सो मूल्यमा पनि बिक्री नभएपछि मूल्य घटाएर प्रतिकेजी रु ५६ बनाइएको थियो ।

सर्वसाधारणले अझै महँगो भनी खरिद नगरेपछि पुनः मूल्य घटाएर प्रतिकेजी रु ४५ प्रस्ताव गरी पठाइएको संस्थान डोल्पा शाखाका प्रमुख कमलराज पाण्डेले जानकारी दिए । उनका अनुसार बजारमा पाइने चामलको मुल्य प्रतिकेजी रु ५१ रहेको छ । जापानी चामल मधुमेहका बिरामीले समेत खाना मिल्ने उनले बताए ।

संस्थानको गोदाममा जापानी चामल अघिल्लो आर्थिक वर्षकै बाँकी रहेको छ । संस्थानको शाखा कार्यालय दुनैमा ५८५ क्विन्टल, सर्मी डिपोमा १३८ क्विन्टल र जुफाल गोदाममा २८१ क्विन्टल र काइगाउँ डिपोमा १०० क्विन्टल जापानी चामल मौज्दात रहेको छ । लामो समयसम्म महँगोकै कारण चामल थन्किने कार्यलाई हल गर्न प्रतिकेजी रु ४५ को नयाँ मूल्य प्रस्ताव गरी केन्द्रीय कार्यालयमा पठाएको संस्थान प्रमुख पाण्डेले जानकारी दिए ।

मूल्य घटाएपछि जापानी चामल बिक्री हुने अपेक्षा लिएको पाण्डेले बताए ।

प्रकाशित मिति: २६ पुष २०७५, बिहीबार १३:४८

प्रतिक्रिया दिनुहोस्