तेस्रो पटक संवैधानिक परिषदको बैठक स्थगित, प्रधानन्यायाधीश सिफारिसमा अझै अन्योल
काठमाडौं : मंगलबार साँझ बोलाइएको संवैधानिक परिषदको बैठक पनि स्थगित भएको छ । यससँगै प्रधानन्यायाधीश सिफारिस अझै पर धकेलिएको छ ।
यसअघि मंसिर १७ गते बसेको बैठक अनिर्णित भएपछि २२ गते बोलाइएको थियो । शनिबार परेको भन्दै आज मंगलबार बैठक राखिएको थियो तर, अन्तिम समयमा आएर स्थगित गरिएको हो ।
प्रधानन्यायाधीशको विषयमा प्रधानमन्त्री केपी शर्मा ओली र विपक्षी दलका नेता शेरबहादुर देउवाबीच छलफल हुन बाँकी रहेकाले मंगलबारको संवैधानिक परिषदको बैठक स्थगित भएको स्रोतको भनाइ छ ।
संवैधानिक परिषद्को अर्को बैठक पुस ५ गते बोलाइएको छ । नयाँ प्रधानन्यायाधीशका लागि चोलेन्द्रशमसेर जबरा र दीपकराज जोशीको नाम न्याय परिषदले परिषदमा पठाएको छ ।
जोशी यसअघि संसदीय सुनुवाई समितिबाट अस्वीकृत भइसकेकाले चोलेन्द्र प्रधानन्यायधाधीश सिफारिस हुने सम्भावना छ ।
प्रधान न्यायाधीश रिक्त हुनुभन्दा एक महिनाअघि नयाँको नाम सिफारिस गर्नुपर्ने प्रावधान छ । वर्तमान प्रधानन्यायाधीश ओमप्रकाश मिश्र उमेरका कारण पुस १७ गते अवकाश हुँदैछन् ।
