संविधान विरोधी जुलुसमा मोटरसाइकलमा सवार भएर सहभागी भए सरकारका मन्त्री
संविधान दिवसको विरोधमा बुधबार जनकपुरमा आयोजना गरिएको जुलुसमा प्रदेश २ का समाजिक विकास मन्त्री नवलकिशोर साह पनि सहभागी भएका छन् । राष्ट्रिय जनता पार्टी (राजपा) ले संविधान दिवसलाई कालो दिन भन्दै आयोजना गरेको जुलुसमा मन्त्री साह सशस्त्र प्रहरीका अंगरक्षक सहित सहभागी भए । तर उनले सरकारी गाडी-आदिको प्रयोग भने गरेका थिएनन् । उनी मोटरसाइकलमा सवार भएर कार्यक्रममा सहभागी भएका थिए ।
प्रदेश २ मा संघीय समाजवादी फोरमसँग मिलेर सरकार बनाएको राजपाले संघीय सरकारलाई समेत समर्थन गरेको छ। संविधानप्रति असहमति जनाउँदै राजपाले बुधबार मधेसमा विरोध प्रदर्शन गरेको छ । जनकपुरको विरोध प्रदर्शन कार्यक्रमको कमान्ड पार्टीले मन्त्री साहलाई सुम्पेको छ। मन्त्री साह निजी नम्बरको मोटरसाइकल चढेर जनकपुरको जनक चोक पुगेका थिए ।
मन्त्री साह पुगेपछि त्यहाँ भेला भएका राजपाका नेता/कार्यकर्ताले कालो झण्डा बोकेर प्रदर्शनमा उत्रिएका थिए । मन्त्री साहले त्यसको अगुवाई गरेका थिए । उनीसँगै संविधान विरोधी जुलुसमा राष्ट्रिय सभाका राजपाका सांसद बृषेशचन्द्र लाल, प्रदेशसभा सदस्य परमेश्वर साह लगायतको सहभागिता थियो ।
